කොළඹ කොටස් හුවමාරුව (CSE) සහ බටහිර කැනඩා විශ්වවිද්‍යාලය (UCW) එක්ව අන්‍යොන්‍ය සංවර්ධනය සඳහා වූ සහයෝගිතා ප්‍රයත්නය විධිමත් කිරීම සඳහා අවබෝධතා ගිවිසුමක් අත්සන් කරන බව නිවේදනය කළේය.

මෙම අවබෝධතා ගිවිසුම, විධායක පුහුණු අවස්ථාවල සහයෝගිතාව සහ අනාගත සහයෝගිතාව ප්‍රවර්ධනය කිරීම කෙරෙහි අවධානය යොමු කරමින් සංවිධාන දෙකේ පොදු අවශ්‍යතා හඳුනා ගැනීම සඳහා යෝජනා කර ඇත.

මෙම අවබෝධතා ගිවිසුම ව්‍යාපාර විශ්ලේෂණ, මූල්‍ය හා අවදානම් කළමනාකරණය යන අංශවල පුහුණුව හා නිපුණතා වර්ධනය සඳහා සහයෝගයෙන් කටයුතු කිරීමට දායක වීමට නියමිතය. මූලිකව, සංවිධාන දෙක ඒකාබද්ධව UCW හි කීර්තිමත් පීඨය විසින් මෙහෙයවනු ලබන විධායක වැඩසටහනක් දියත් කරනු ඇත.

මෙම වැඩසටහන ඉලක්ක කරන්නේ මූල්‍ය ක්ෂේත්‍රයේ නියැළී සිටින්නන් සහ ආයෝජන විශ්ලේෂණය සහ කළමනාකරණය, ගෝලීය මූල්‍ය ආයතන කළමනාකරණය සහ ව්‍යාපාර විශ්ලේෂණ වැනි ක්ෂේත්‍ර ආවරණය වන පරිදිය. මේ සඳහා සම්බන්ධවන්නන්ගේ ප්‍රවේශ වීමේ සුදුසුකම් සපුරාලන විට UCW මගින් ප්‍රදානය කරනු ලබන MBA පාඨමාලාව තෙක් ඉදිරියට යාමට මෙයට සහභාගිවන්නන් උනන්දු කරවනු ඇත.

කොළඹ කොටස් හුවමාරුවේ ප්‍රධාන විධායක නිලධාරි රජීව බණ්ඩාරනායක මහතා මෙම ඉදිරි ගමන පිළිබඳව අදහස් දක්වමින් මෙසේ සඳහන් කළේය.

“මෙම අවබෝධතා ගිවිසුමෙන් UCW සමඟ විධිමත් සහයෝගිතා මාර්ගයක් ස්ථාපිත කිරීමට ලැබීම ගැන අපි සතුටු වෙමු. ප්‍රාග්ධන වෙළෙඳපොළ තුළ අධ්‍යාපනය ප්‍රධානතම කාර්යභාරයක් ඉටු කළ යුතු යැයි අපි සලකන අතර CSE හි අධ්‍යයන කටයුතු ප්‍රශස්ත මට්ටමකට ගෙන ඒම සඳහා ප්‍රගතිශීලී සංවිධාන සමඟ සහයෝගිතාව වර්ධනය කරගැනීමට අපි උත්සාහ කරන්නෙමු. කොළඹ කොටස් හුවමාරුව UCW සමඟ ආකර්ෂණීය හා අන්‍යොන්‍ය වශයෙන් වාසිදායක සම්බන්ධතාවක් බලාපොරොත්තු වන්නෙමු.”