‘කොවිඩ්-19’ හෙවත් කොරෝනා වයිරස වසංගතය හේතුවෙන් පසුගිය වසර හා සැසඳීමේදී මේ වසරේ මුල් මාස නවයේදී සංචාරක ඉපැයීම් 63.1% කින් පහත වැටී ඇතැයි ශ්‍රී ලංකා මහ බැංකුව සඳහන් කරයි.

ඉකුත් වසරේ සැප්තැම්බර් මාසයේදී මෙරට සංචාරක කර්මාන්තය උපයාගෙන ඇති මුදල ඇමෙරිකානු ඩොලර් මිලියන 205ක් වන අතර එම වසරේ මුල් මාස නවයේදී උපයාගෙන ඇති සංචාරක ආදායම ඇමෙරිකානු ඩොලර් මිලියන 2,594කි.

කෙසේ නමුත් පසුගිය සැප්තැම්බර් මාසයේදී කිසිදු සංචාරක ආදායම් නොලැබී ඇති අතර මේ වසරේ ජනවාරි මාසයේ සිට සැප්තැම්බර් මාසය දක්වා ලැබී ඇති සංචාරක ආදායම ඇමෙරිකානු ඩොලර් මිලියන 956කි.

‘කොවිඩ්-19’ හෙවත් නව කොරෝනා වයිරස ගෝලීය වසංගතය හේතුවෙන් මෙරට ගුවන් තොටුපොළ සහ වරාය සියල්ල අඛණ්ඩව හයවැනි මාසයටත් වසා දැමීම හේතුවෙන් මෙරට සංචාරක කර්මාන්තයෙන් ලැබෙන ආදායම් එලෙස පහළ ගියේ යැයි ද ශ්‍රී ලංකා මහ බැංකුව සඳහන් කරයි.

පසුගිය වසරේ සැප්තැම්බර් මාසය දක්වා මුල් මාස නවයේදී මෙරටට පැමිණි සංචාරකයන්ගේ ගණන 1,376,312ක් වන අතර මේ වසරේ මේ දක්වා කාලයේදී මෙරටට පැමිණි සංචාරකයන්ගේ ගණන 507,311කි. එය ද වසරේ මුල් මාස තුනේ පැවැති සංචාරකයන් ය.

දැනට ලැබී ඇති දත්ත මත මෙම ගණනය කළ බව ද පසුව සංශෝධනය විය හැකි බව ද ශ්‍රී ලංකා මහ බැංකුව සඳහන් කරයි.