ජෝන් කීල්ස් පදනම සහ ජෝර්ජ් කීට් පදනම එක්ව සංවිධානය කළ කලා පොළ 2021 නත්තල් අදියර, පසුගියදා අතිසාර්ථක ලෙස මාර්ගගත (Online) ක්‍රමයට පැවැත්විණි. මේ යටතේ කලා ශිල්පීන්ට තම නිර්මාණ ප්‍රදර්ශනය කිරීමටත්, අලෙවි කිරීමටත් www.srilankanartgallery.com ඩිජිටල් වෙබ් ගැලරිය ඔස්සේ අවස්ථාව සලසා දෙන ලදී.

කලා පොළ යනු ජෝර්ජ් කීට් පදනමේ සංකල්පයක් අනුව ආරම්භ වූ වැඩසටහනක් වන අතර, පසුගිය වසර 27ක කාලය තුළ ජෝන් කීල්ස් සමූහ ව්‍යාපාරය එහි ප්‍රධාන අනුග්‍රාහක සහ කළමනාකරු ලෙස කටයුතු කර ඇත. ශ්‍රී ලාංකික කලා ශිල්පීන්ට අත්වැලක් වෙමින්, ඔවුන්ට තම නිර්මාණ දේශීය හා ජාත්‍යන්තර වෙළෙඳපොළ වෙත රැගෙන යාමට අවස්ථාව සලසා දෙන මෙම වැඩසටහන, ජෝන් කීල්ස් පදනමේ ප්‍රජා සත්කාර වැඩසටහන් තුළ මූලික අවධානයක් යොමුවන අංශයක් වන ‘කලාව හා සංස්කෘතිය’ යටතේ ක්‍රියාවට නැංවෙන ප්‍රමුඛතම වැඩසටහනකි.

කොවිඩ් තත්ත්වය හේතුවෙන් 2021 පෙබරවාරි හා මාර්තු යන මාසවලදී කලා පොළ වැඩසටහන මුල්ම වරට අන්තර්ජාලය ඔස්සේ පවත්වන ලදී. එහි සාර්ථකත්වය හේතුවෙන් නත්තල් සමය වෙනුවෙන් එහි තවත් අදියරක් පැවැත්වීමට සංවිධායකවරු කටයුතු කළහ. මීට කලාකරුවන් 273 දෙනකු නිර්මාණ 5,034ක් ඉදිරිපත් කර තිබූ අතර, අන්තර්ජාලය ඔස්සේ 64,700කට අධික පිරිසක් මෙම කලා පොළ නැරැඹීමට එක්වූහ. මෙහිදී කලා නිර්මාණ 422ක් අලෙවි කිරීමෙන් ලද ආදායම රුපියල් මිලියන 12.6ක් පමණ විය.