(නිමල කොඩිතුවක්කු)

කොළඹ වරායේ සියලු ආනයන නිෂ්කාෂණ කටයුතු අන්තර්ජාල පහසුකම යටතේ විද්‍යුත් ගෙවීම් ලෙසින් සිදු කිරීමට ශ්‍රී ලංකා වරාය අධිකාරිය පියවර ගෙන තිබේ.

වරාය භාවිතා කරන්නන්ට කිසිදු අපහසුතාවයකින් තොරව සිය වරාය ගෙවීම් කටයුතු පහසුවෙන් සිදුකිරීමේ අපේක්ෂාවෙන් මෙම වැඩපිළිවෙල ක්‍රියාත්මක බව වරාය අධිකාරිය නිවේදනය කරයි.

ඒ අනුව පූර්ණ හා අර්ධ බහලුම් නිෂ්කාශනය කිරීමේදී විද්‍යුත් ක්‍රමවේද ඔස්සේ ගෙවීම් සිදු කිරීමට අදාළ නිශ්පාදන ආයතන හරහා ශ්‍රී ලංකා වරාය අධිකාරිය වෙබ් අඩවිය වන www.slpa.lk වෙත පිවිස සිය සේවාවන් ඉටු කර ගැනීමට සියලු පහසුකම් සලසා ඇත.

සෞඛ්‍ය ආරක්ෂිත රෙගුලාසි වලට අනුව කටයුතු කරමින් වරාය සේවක පිරිස සහ වරාය භාවිතාකරන්නන් අධි වසංගත තත්ත්වයෙන් ආරක්ෂා කිරීමට සියලු පියවර ගෙන  ඇතැයිද ශ්‍රී ලංකා වරාය අධිකාරියේ සභාපති ජෙනරාල් දයා රත්නායක මහතා පැවසීය.

ශ්‍රී ලංකා වරාය අධිකාරිය සහ අනෙකුත් සියලුම පර්යන්ත උපායමාර්ගික අර්බුද කළමනාකරණ සැලැස්මක් ක්‍රියාවට නංවමින් වරාය මෙහෙයුම් නිසි පරිදි පවත්වා ගැනීමට කටයුතු කර ඇති බවද ඒ මහතා වැඩිදුරටත් සඳහන් කරයි.