(විනීතා එම්. ගමගේ)

කැලණිය විශ්වවිද්‍යාලයේ විද්‍යාත්මක වීදුරු උපකරණ නිර්මාණ මධ්‍යස්ථානයේ වීදුරු භාණ්ඩ නිෂ්පාදන පාඨමාලාව  හැදෑරීමට උනන්දු දරුවන්ට එම මධ්‍යස්ථානය විවෘතව ඇත.

විද්‍යාගාරයන්හි නිතර භාවිත වන වීදුරු භාණ්ඩ, පර්යේෂණ සඳහා අවශ්‍ය විශේෂිත මාදිලියේ විද්‍යාත්මක වීදුරු උපකරණ හා විසිතුරු වීදුරු භාණ්ඩ දැනටමත් මෙහි නිපදවන බව විද්‍යාත්මක වීදුරු උපකරණ නිර්මාණ මධ්‍යස්ථානයේ සම්බන්ධීකාරක මහාචාර්ය චන්දිමා ජයසූරිය මහත්මිය පැවසුවාය.

රජයේ ප‍්‍රවෘත්ති දෙපාර්තමේන්තුවේ අද (2) පැවති මාධ්‍ය හමුවක දී අදහස් දක්වමින් ඇය මෙසේ ප‍්‍රකාශ කළාය.

මෙම මධ්‍යස්ථානය පුළුල් කර නව නිර්මාණ බිහිකරන්නටත් මේ කේෂ්ත‍්‍රය සඳහා පුහුණුකරුවන් පුහුණු කිරීමේ කටයුතු පුළුල් කිරීමට සැලසුම් කර ඇති අතර දැනටමත් දින 5 කඩිනම් පාඨමාලාවක් හා දින 30 ක පුළුල් පාඨමාලාවක් පැවැත්වේ.  

මේ වනවිට එහි පුහුණු සේවකයන් දෙදෙනෙකු සේවය කරන අතර ඔවුන් දෙදෙනාගෙන් එක් අයකු බ්‍රිතාන්‍යයේ ග්ලාස්ගෝ විශ්වවිද්‍යාලයේ හය මසක පුහුණුවක් ලබා ඇත.  

ඉදිරි වසර පහේ දී ජාත්‍යන්තර මට්ටමේ මධ්‍යස්ථානයක් බවට මෙම මධ්‍යස්ථානය පත් කිරීම තම අරමුණ බවත් ඒ සඳහා සියලු අංශවල සහය ලැබෙන්නේ නම් කිසිසේත්ම එය අමාරු කටයුත්තක් නොවනු ඇතැයි පැවසූ ඇය මෙම ව්‍යාපාරය රට පුරා ප‍්‍රචලිත කිරීමට ද හැකිවන බව පෙන්වා දුන්නාය.

1990 දී ආරම්භ කළ මෙම මධ්‍යස්ථානය 1999 දී විද්‍යා හා තාක්ෂණ අමාත්‍යංශය මගින් ආරම්භ කරනු ලැබූ ආසියානු සංවර්ධන බැංකු ව්‍යාපෘතීය මගින් ලැබුණු අරමුදල් ඉතාමත් දියුණු උපකරණ සහිත මධ්‍යස්ථානයක් බවට පත් කරගනු ලැබු බව පෙන්වා දුන් ඇය මේ වනවිට එහි සේවය කරන නිලධාරීන් දෙදෙනාම විදේශ පුහුණුව ලැබුවන් බව පෙන්වා දුන්නාය.

වීදුරු භාණ්ඩ නිෂ්පාදනය හැරුණු විට මිල අධික කැඩුණු වීදුරු භාණ්ඩ අලුත්වැඩියා කිරීමට එහි කටයුතු කරන බවත් බියුරෙට්ටු , පිපෙට්ටු, කන්ඩෙන්සර, ඉලෙක්ට්‍රෝඩ, නිස්සාරණ උපකරණ වැනි දෑ ද සංකීර්ණ වීදුරු උපකරණ ද මෙහිදී අලුත්වැඩියා කරන බව ජයසූරිය මහත්මිය පැවසුවාය.

මෙම මධ්‍යස්ථානයේ පුහුණුව ලැබීමට හෝ එමගින් යම් සේවාවක් ලබා ගැනීමට අවශ්‍ය අයකුට විද්‍යාත්මක වීදුරු උපකරණ නිර්මාණ මධ්‍යස්ථානයේ 0112903265 හෝ 0714311286 දුරකථන අංකවලින් හෝ [email protected]  යන  විද්‍යුත් ලිපිනයෙන් හෝ මේ පිළිබඳ වැඩිදුර විස්තර ලබා ගත හැකිය.