(දෙල්ගොඩ සුදත් පුබුදු කීර්ති)
සිය යෙහෙළියගේ විවාහ ලියාපදිංචි උත්සවයට පැමිණි තරුණියක මනාලියගේ රන් මාලය සහ පෙන්ඩනය සොරාගෙන ගොස් උකස් කිරීමේ සිද්ධියක් මීගහවත්ත පොලිස් වසමේ දෙල්ගොඩ සියඹලාපේවත්ත ප්‍රදේශයෙන් වාර්තා වේ.

 මෙම තරුණිය සිය යෙහෙළියගේ විවාහ උත්සවයට පෙර දින ඉකුත් (16) දා සියඹලාපේවත්ත යෙහෙළියගේ නිවෙසට පැමිණ ඇය සමඟ නිවසේ එකම කාමරයක රාත්‍රිය ගත කරමින් මනාලියගේ රන් භාණ්ඩ තැන්පත් කර ඇති ස්ථානය පිළිබඳව සෙවිල්ලෙන් සිට ඇත.
මනාලිය රාත්‍රී නින්දට යාමෙන් පසු හොර රහසේ අවදි වී ඇති මෙම තරුණිය අල්මාරියක තිබූ මනාලියගේ රන් මාලය සහ පෙන්ඩනය සොරාගෙන හිමිදිරියේ මෙම නිවෙසින් පලාගොස් ඇත.

 පසුව ඇය බියගම බණ්ඩාරවත්ත ප්‍රදේශයේ උකස් මධ්‍යස්ථානයකට රු. 29,000 කට රන්මාලය උකස් කර තිබියදී පොලීසිය විසින් සොයාගෙන ඇත.

සැකකාරිය කොට්ටාව ප්‍රදේශයේදී මීගහවත්ත පොලීසිය විසින් අත්අඩංගුවට ගෙන ඇති අතර ඇය මහර මහේස්ත්‍රාත් අධිකරණය වෙත ඉදිරිපත් කිරීමට පියවර ගෙන ඇත.

 මීගහවත්ත පොලීසියේ ස්ථානාධිපති ප්‍රධාන පොලිස් පරීක්ෂක ඉන්දික වික්‍රමසිංහ, අපරාධ විමර්ශන අංශයේ ස්ථානාධිපති පොලිස් පරීක්ෂක බී.ඒ.පී.ආර්. ප්‍රේමලාල්, පොලිස් කොස්තාපල්වරු වන 13405, අබේසිංහ, 78653 වීරසිංහ, 32625 තිලකරත්න යන නිලධාරීහු වැඩිදුර පරීක්ෂණ මෙහෙයවති.