(බලන්ගොඩ විශේෂ - වයි.ඒ.එස්. වීරවංශ සහ රාස්සගල - සම්පත් ප්‍රියනන්දන)
බළන්ගොඩ ප්‍රදේශයේ තරුණයකුගේ පුරුද්දක් වූයේ නගරයේ වෙළඳ සලකින් දිනපතාම ලොතරැයි ටිකට්පත් අටක් මිලදී ගැනීමය. ටිකට් පත් මිලදී ගැනීමෙන් අනතුරුව පසු දින වෙළඳ සලට පැමිණ දිනුම් ඇද්දැයි පරීක්ෂා කිරීම ඔහුගේ සිරිතකි. 

ඇතැම් විට එම ටිකට්පත්වලට සුළු සුළු දිනුම් අවස්ථා තිබිණි. ඔහු ටිකට්පත් අටක් මිලදී ගත්ත ද දිනුම් ඇද්දැයි පරීක්ෂා කරන විට ඔහු අත ලොතරැයි පත් දහයක් දොළහක් තිබේ. මෙය වෙළඳ සල් හිමියාට ගැටලුවකි. ඔහු දිනක් තම හිතවතෙකුගේ වීඩියෝ කැමරාවක් ඉල්ලාගෙන තරුණයා ලොතරැයි පත් මිලදී ගැනීමට පැමිණෙන අවස්ථාවේ කැමරාව ඔහු දෙසට හරවා හොර රහසේ ක්‍රියාත්මක කළේය. ලොතරැයි ගැණුම්කරු වෙළඳ පොළෙන් පිටව ගිය පසු කැමරාවේ වීඩියෝ සටහන් පරීක්ෂා කර බැලුවේය. 

කැමරාවේ සටහන්ව තිබුණේ තරුණයා මිලදී ගන්නා ටිකට්පත් අටට අමතරව හොර රහසේ තවත් ටිකට්පත් කිහිපයක් සාක්කුවට දමා ගන්නා අයුරුය. පසුදා තරුණයා වෙළඳ සලට පැමිණි පසු ඔහුට වීඩියෝව පෙන්නුවේය. තරුණයාට තරු විසිවිණි. මට සමාවෙන්න මුදලාලි. මම ආයෙ එහෙම හොරකම් කරන්නේ නැහැ. ඔහු බැගෑපත් විය. හරි කමක් නැහැ තරුණයෙකු නිසාත් සමාව ගත්ත නිසාත් මම පොලිසියට මේ ගැන පැමිණිලි කරන්නේ නැහැ. හැබැයි මට වෙච්ච පාඩුව වෙනුවෙන් රුපියල් දසදහසක් ඕනි. කොච්චර ටිකට්පත් හොරකම් කළා ද කියලා මම දන්නෙත් නැහැනෙ. 

මුදලාලි දැන් මගේ අතේ දසදහසක් නෑනෙ. හෙට කොහොම හරි ගෙනත් දෙන්නම් කියා වෙළඳ සලෙන් පිටව ගිය අතර පසු දින උදෑසනම මුදලාලිට අලුත්ම දහසේ කොළවලින් රුපියල් දසදහසක් ලබා දීමට තරුණයා කටයුතු කළේය.