අවුරුද්දට තමන් මිලදී ගත් මත්පැන් බෝතලයක් අත්වැරැද්දකින් වෙනත් පිරිසකට දන්දීමේ සිදුවීමක් බුලත්කොහුපිටිය ප්‍රදේශයෙන් වාර්තා විය.
සිද්ධිය සැකෙවින් මෙසේය. 

පසුගිය දින පැවති අවුරුදු උත්සවය නිමිත්තෙන් සෑම තැනම පාහේ ගජරාමෙට අවුරුදු සාද පැවැත්විණි. සිද්ධියට සම්බන්ධ පිරිස ද අවුරුදු සැමරීම වෙනුවෙන් සුළු සාදයක් සංවිධානය කරගත්තේය.

ඒ සඳහා තරුණ පිරිසක් එක්වී සිටියහ. ඔවූහු මත්පැන් බෝතල් කිහිපයක් හිස් කරමින් සාදයක් පැවැත්වූහ. ඒ අතරතුර ඔවුන් බොමින් සිටි මත්පැන් බෝතල් සියල්ලම හිස්විය. එහෙත් බීපු ප්‍රමාණය මදි වූ බව පිරිසකට වැටහුණි.

ඔය අතරතුර සිටි එක් තරුණයකු රුපියල් දෙදාස් පන්සීයක මුදලක් අතට රැගෙන තවත් බෝතලයක් රැගෙන එන ලෙසට එම පිරිසට දුන්නේය. නමුත් කිසිවෙකුත් එම මුදල රැගෙන තනිවම තැබෑරුමට යාමට අදිමදි කළේය. එහෙනම් ඔක්කොමලා ටවුමට ගිහින් බෝතලයක් ගේමු යැයි ඔවූහු කතිකා කර ගත්හ.

පසුව පිරිස සූර් මතින් ත්‍රීරෝද රථ දෙකකින් ගොස් තැබෑරුමෙන් බෝතලයක් මිලදී ගත්හ. බෝතලය මිලදීගත් තරුණයා මුදල් දුන් තරුණයාට ඉතිරි මුදලක් ද ආපසු දුන්නේය. තැබෑරුම අසල ත්‍රීරෝද රථ බොහොමයක් නවතා තිබිණි. වෙරි මතින් සිටි බෝතලය මිලදී ගත් තරුණයා තම පිරිස පැමිණි ත්‍රීරෝද රථයක් යැයි සිතා මත්පැන් බෝතලය රැගෙන වෙනත් ත්‍රීරෝද රථයක පිටුපසට දැම්මේය. එහෙනම් බෝතලය ගත්තානෙ අපි යමු යැයි කියා පිරිස නැවතත් සාදය තිබුණු තැනට ත්‍රීරෝද රථවලින් ගියහ. පසුව මත් වතුර බෝතලය ගෙන එන ලෙස අර තරුණයාට කීය. 

ඔහු එක ත්‍රීරෝද රථයක පිටුපස බෝතලය තිබෙනවාද බලා එම රථයේ නොමැති නිසා අනෙක් රථයේ පිටුපස බැලීය. හරි පුදුමයකි. එම ත්‍රීරෝද රථ දෙකේම මත් වතුර බෝතලයක් නොතිබිණි. පසුව සියලු දෙනාටම කාරණය වැටහුණි.

“මූ අපේ ත්‍රීවීල් එක කියලා අල්ලපු ත්‍රීවීල් එකට තමයි බෝතලය දාලා තියෙන්නෙ. කමක් නැහැ. එහෙනම් දානයක් දුන්නා කියලා හිතාගෙන තව බෝතලයක් ගෙන එමු” කියලා සියලු දෙනාම මුදල් එකතු කර ආයෙත් මත්වතුර බෝතලයක් රැගෙනවිත් සතුටු වුණාලු.

(බුලත්කොහුපිටිය - රවීන්ද්‍ර වෙලගෙදර)