(කොබෙයිගනේ නිමල් ප්‍රේමචන්ද්‍ර)
උපැස් යුවළක් හේතුවෙන් අනියම් බිරියගේ නිවසට ගොඩවැදුණු බව සිය බිරියට හෙළිවූ බව කියැවෙන පුවතකි මේ. වාර්තා වන්නේ කුරුණෑගල දිස්ත්‍රික්කයේ ගම්මානයකිනි. 

එම පුවත සැකවින් මෙසේයි. 

අවුරුදු 65 පමණ වයසැති එක්දරු පියෙකු වූ ඔහු සිල්ලර වෙළඳසලක් පවත්වාගෙන යන ව්‍යාපාරිකයෙකි. වෙළඳසැළ පවත්වාගෙන යන්නේ නිවස අසලමය. නිවසේ සිටියේ බිරිය හා ඔහු පමණි. 

සිය සැමියා ගමේ ජීවත්වන රූමත් වැන්දඹු කාන්තාවක් සමග අනියම් ඇසුරක් පවත්වාගෙන යන බවට තොරතුරක් සති කිහිපයකට පෙර මුදලාලිගේ බිරියට පැවසුවේ ගමේ සිටින ඇගේ මිතුරියකි. එය කන වැටුණුදා සිට ඇය කල් ගත කළේ සිය සැමියා පිළිබඳව මහත් විමසිල්ලකිනි. මේ ගැන ඔහුගෙන් විමසුවද ඔහු පැවසුවේ ඔවුන්ගේ දියුණුවට ඉරිසියාවෙන් ගමේ අය මෙවැනි කටයුතු පතුරුවන බවකි. 
පසුගිය දිනක දහවල් ඔහු සිය බිරියට වෙළඳසැලට එන ලෙසද පවසා නිවසින් පිටවූයේ චෙක්පත් කිහිපයකට මුදල් දැමීම සඳහා බැංකුවට යාමට ඇති බව කියමිනි.

ඔහු නිවසින් පිටත්ව ගොස් පැයකට පමණ පසු කුඩා දරුවෙක් වෙළඳසැල වෙත පැමිණියේ කිසියම් දෙයක් අතැතිවය. 

‘‘පුතා මොනවාද ඕනෑ’’ මුදලාලි බිරිය විමසුවාය.

‘‘මට මොකුත් ගන්න ඕනෑ නෑ. අද දවල් මුදලාලි මාමා බයික් එකේ ...... නැන්දලාගේ ගෙදර ඉඳන් එද්දී එයාගේ ගේ ඉස්සරහ පාරේදී ඇස් කණ්ණාඩි කුට්ටම වැටුණා. මම ආච්චිලාගේ ගෙදර යන ගමන් හිටියේ. මම ඒක අහුලා ගත්තා. මුදලාලි මාමාට ඒක දෙන්න.’’

දරුවා පිටත්ව ගොස් ටික වේලාවකින් මුදලාලි පැමිණි අතර ඔහු බිරිඳට පැවසුවේ බැංකුවේ විශාල සෙනඟක් සිටි නිසා ප්‍රමාද වූ බවකි. 
‘‘අද සඳුදා නිසා බැංකුවේ හුඟක් සෙනඟ. බැංකුව ඇතුළට ගන්නේ හතර දෙනා ගානේ. හරි වැඩේ මගේ කණ්ණාඩි කුට්ටම කොහෙද වැටිලා. බැංකුවට ගිහිල්ලා බලනකොට ඒක නෑ.’’

‘‘ආ ඇත්තද? ඒක අර ගෑණිගේ ගෙදර ඉස්සරහ වැටිලා තිබිලා ළමයෙක් ගෙනත් දුන්නා. බැංකුවට යන්න ඉස්සර වෙලා, එහාටත් ගිහිල්ලා යන්න ඇතිනේ. මම දුවට කෝල් එකක් දුන්නා. මම අදම එහේ යනවා.’’

මුදලාලිට තරු විසිවී දාඩිය දැම්මේ එය ඇසීමෙනි. මුදලාලි කිසිවක් නොකියාම සිය කාමරයට ගියේ තමා ගිය හොර ගමන බිරිඳට අතේ මාට්ටුවී ඇති බව දැනගත් නිසාය.