(කොබෙයිගනේ නිමල් පේ‍්‍රමචන්ද්‍ර)

පදිංචිකරුවන් නිවෙසේ නොසිටි රාත‍්‍රියක නිවෙසට ඇතුළු වූ සොරුන් කණ්ඩායමක් එම නිවෙසේ රණ්භාණ්ඩ හෝ මුදල් කිසිවක් සොරා ගැනීමට නොහැකි වූ නිසා කෝපයට පත්ව නිවැසියන්ට අපහාසවන අයුරින් දැන්වීම් කීපයක් ලියා නිවෙසේ බිත්තියක හා ගේට්ටුවේ අලවා ගොස් තිබූ පුවතක් වාර්තා වෙන්නේ වයඹ පළාතේ එක්තර ගම්මානයකිනි.

එම නිවෙසේ හිමිකරු රජයේ ආයතනයක ලිපිකරුවෙකි. බිරිය ගුරුවරියකි. පසුගිය දිනක ඔවුන් දෙදෙනා ඔවුන්ගේ දරුවා ද කැටුව අසල ගමක ඥාතියකුගේ නිවෙසක පැවැති පිරිත් පිංකමකට ගොස් නැවත නිවෙසට පැමිණියේ රාත‍්‍රී 11ට පමණය. නිදන කාමරයට ඇතුළු වී අල්මාරිය කඩා එහි තිබූ ඇඳුම් එළියට ඇද දමා ඇති අයුරුත්, අල්මාරියේ ලාච්චුව කඩා ඇති අයුරුත්, කෑම කාමරයේ ඇති ශීතකරණය විවෘත කර තිබෙන අයුරුත් නිවෙසට පැමිණ විගසම ඔවුනට දැකගත හැකිවිය.

සොරුන් කණ්ඩායමක් නිවෙසට ඇතුළු වී රන් භාණ්ඩ මුදල් හා වෙනත් වටිනා දේ සොයා ඇති බව ඔවුනට වැටහිනි. මෙම දර්ශනය දැකීමෙන් ඔවුන්ගේ කුඩා දරුවා භීතියට හා කම්පනයට පත්වුව ද ගෙහිමියා හා ඔහුගේ බිරිඳ එයින් කලබලයට පත් නොවූයේ එදින නිවෙසින් පිටව යාමට පෙර ඔවුන්ගේ රන්භාණ්ඩ හා මුදල් කිසිවකුට සොයාගත නොහැකි ආරක්ෂක ස්ථානයක සඟවා ගිය නිසාය.

එම රන්භාණ්ඩ හා මුදල් තබා ගිය ස්ථානයේ ආරක්ෂිතව තිබූ නිසාත් නිවෙසට පැමිණි සොරුන් නිවෙසේ කිසිවක් සොරාගෙන ගොස් නොතිබූ නිසාත් මේ පිළිබඳව පොලිසියට පැමිණිලි නොකිරීමට ඔවුන් තීරණය කළ අතර එදින රාත‍්‍රී සොරුන් කණ්ඩායම නිවැසියන්ට පරුෂ වචනයෙන් බැණ වදිමින් ලියා නිවෙසේ ගේට්ටුවේ හා තවත් ස්ථාන කිහිපයක අලවා තිබූ දැන්වීම් (කැලෑපත්තර) කියවීමෙන් පසුදින උදෑසන ගෙහිමියා හා ඔහුගේ බිරිඳ මහත් සතුටක් ලැබූහ.

එම දැන්වීම්වලින් කියැවුණේ ලොකු නිවෙසක සිටියත් ධනවතුන් බව රටට සමාජයට පෙන්වූවත් මෙම නිවෙසේ සිටින්නේ අතේ සතේ නැති අය බවත් ශීතකරණ තිබුණාට ඒවායේ කෑම ජාති කිසිවක් නැති බවත් නිවෙසේ ජීවත්වන අය නොකා නොබී ලෝභකමින් ජීවත්වන පිරිසක් බවත්ය.