(හක්මන විශේෂ දෙනගම යසන්ත ආරියසේන)

තරුණයකුගේ ආදරය හිමි කරගැනීමට ගත් උත්සාහයක් අසාර්ථක වී තරුණියට පොලිස් කූඩුවේ ලගින්නට වූ සිදුවීමක් දකුණු පළාතේ පිටිසරබද ප්‍රදේශයකින් වාර්තා වේ. 

ප්‍රියමනාප පෙනුමකින් යුත් දුටුවන්ගේ සිත් වසඟ කරවන සුළු තරුණයෙක් සිය මව සහ සොයුරිය ද රැකබලා ගනිමින් ව්‍යාපාරයක නියැලෙමින් ජීවත් විය.

ප්‍රදේශයේ සියලුම දෙනා සමග ඉතා සුහදව කටයුතු කළ තරුණයකු වූ මොහු නිහතමානී අභිමානයක් ඇතිව ජීවිකාව ගෙන ගියේය. ඒ නිසා වයස් බේදයකින් තොරව සියලුම දෙනා තරුණයා ඇතුළු පවුලේ අයට දැඩි ගෞරවයක් සහ භක්තියක් ද දැක්වූහ.

තරුණයාගේ ව්‍යාපාරික ස්ථානයට යාබද නිවෙසක සිටින බටහිර විලාසිතා හිස මුදුනේ තබාගෙන රූපලාවණ්‍යාගාරයක් පවත්වාගෙන යන තරුණියක් ද වූවාය. ව්‍යාපාරික උන්මාදයෙන් පෙළුණ ඇය නිතර කටයුතු කළේ දැඩි සෝබන ගතියකින් යුතුව වීම නිසා ඇය ද තරුණයන් අතර ජනප්‍රිය චරිතයක් වූවාය.

ඩෙනිම් කලිසමකින් සැරැසී යතුරුපැදියකින් ගමන් බිමන්වල යෙදෙන තරුණිය දුරකතන කාඩ්පත් මිලදී ගැනීම සඳහා තරුණයාගේ වෙළෙඳසලට පැමිණීම පුරුද්දක් වශයෙන්ම සිදු කළාය. ඇතැම් අවස්ථාවල දුරකතන ඇමතුම් ලබාදෙමින් සිය දුරකතනයට මුදල් බැර කර ගැනීම ද කළාය.

වෙළෙඳසලට පැමිණෙන තරුණිය සිදු කරන අනවශ්‍ය උසුළු විසුළු තරුණයාට දැඩි හිසරදයක් වූ අතර, දුරකතනයට ලැබෙන කෙටි පණිවිඩ හා ඇමතුම් වදයක් වී තිබුණි. ආදර වදන් සහිතව සීමාවක් නොමැතිව ලැබෙන පණිවිඩ සහ ඇමතුම් සඳහා තරුණයා ප්‍රතිචාර නොදැක්වූ අතර මේ ගැන සිය මවටත් නැගණියටත් පැවැසුවේය.

මව සහ නැගණිය වෙළෙඳසලේ සිටින අවස්ථාවක තරුණිය පැමිණියාය. තම අයියාට කරදර නොකරන ලෙස නැගණිය තරුණියගෙන් ඉල්ලා සිටි අතර, එයට උරණ වූ තරුණිය මවට සහ නැගණියට බැණ වදිමින් කලහකාරී ලෙස හැසිරෙන්නට වූවාය.

වෙළෙඳසල වසා දමා සිද්ධිය පිළිබඳව ඔවුන් පොලීසියට පැමිණිලි කළ අතර, දෙපාර්ශ්වයම පොලීසියට කැඳවා සිදු කළ විමර්ශනයේදී තරුණිය අවේගශීලීව කතාබහ කිරීම හේතුවෙන් ඇය අත්අඩංගුවට ගන්නා බව පොලීසිය පැවැසීය.

එය ඇසීමෙන් ඇයගේ තේජස බැස ගිය අතර, පැමිණිල්ල සිදු කළ මව සහ දියණිය ඇයට සමාව දෙන ලෙස ඉල්ලා සිටියහ.
තරුණිය ද බැගෑපත්ව සමාව අයැද සිටි අතර, තරුණයාට කරදර නොකරන බවට පොරොන්දුවක් ද වූවාය. පොලීසිය ද ඇයට දැඩිව අවවාද කර මුදාහැරියේ, තරුණයාගේ මවගේත් සහෝදරියගේත් ඉල්ලීම සලකා බලමිනි.