(වැල්ලම්පිටිය ශාන්ත සෙනෙවිරත්න)
නිවසේ අයට කරදර කරන භූතයකු  ඉවත් කිරීමට කට්ටඬියකු දුන් උපදෙස් අනුව තොවිලයකින් පසු හංදියක තැබූ පිදේනි තට්ටුවක තිබූ කාලේ අරක්කු බෝතලය සුළු වේලාවකින් අතුරුදන්වූ පුවතක් තදාසන්න ප්‍රදේශයකින් අසන්නට ලැබිණි.

මෙකී නිවසේ අයට නිතර ලෙඩ හා කරදර පැමිණි තිබේ. 

මෙයට හේතුව කුමක්දැයි විමසීමට නිවැසියන් කට්ටඬි මහතකු හමුවූ පසු කියා ඇත්තේ පෙරේත බැල්මක් නිවසට වැටී තිබෙන නිසා එය ඉවත් කිරීමට නම් තොවිලයක් කර පෙරේතයා සැනසීමට ආහාර පාන ඇතුළත් පිදේනි තටුවක් දිය යුතු බවය.

ඔහු දුන් උපදෙස් අනුව  සියල්ල කළ නිවැසියන් පෙරේතයා සැනසීමට පිදේනි  තටුවක් සකසා තිබෙන අතර එහි කුඩා ප්‍රමාණයේ අරක්කු බෝතලයක් ද කට්ටඬියාගේ උපදෙස් මත තබා ඇත.

තොවිලය අවසානයේ නගරයේ ප්‍රධාන මන්සන්ධියක් අසල මෙම පිදේනි තටුව ප්‍රදර්ශනයට තබා සුළු වේලාවකින්  පසු එහි තිබූ කුඩා අරක්කු බෝතලය අතුරුදන් වී ඇත. එහෙත් අනෙකුත් ආහාර පාන තිබූ ආකාරයටම තිබී ඇත.

 මෙය දුටු නිවැසියන් කියා ඇත්තේ ‘දැන් ඉතිං කරදරය ඉවර වෙයි. පෙරේතයා අරක්කුවලට තමයි වැඩි කැමති වෙලා ඉන්න  ඇත්තේ’ කියා සිත  සනසාගෙන ඇත.