(හක්මණ විශේෂ දෙනගම යසන්ත ආරියසේන)
අම්බලන්තොට බැරගම ප්‍රදේශයේ ජීවත්වූ අඹු සැමි යුවළකි. ඔවුන්ට දරුවෝ දෙදෙනෙක් සිටියහ. දැනට වසර පහකට පමණ පෙර සැමියා හිටිහැටියේම නිවසින් අතුරුදන්වී ඇත. බිරිඳ සැමියා සොයා ගැනීමට නොගිය දේවාලයක් නැත. ඒ තරමටම ඇය සැමියා සොයාගැනීමට වෙහෙසුණාය. සියල්ල අවසානයේ ඇය තම සිත හදාගෙන සැමියාට පින් පිණිස දානමය පින්කම් දෙකක්ද කළේ දරු දෙදෙනාද එකතු කරගෙනය.

අතුරුදන් වූ සැමියා ද මියගිය ආකාරයෙන්ම කටයුතු කර අලව්ව ප්‍රදේශයේ කාන්තාවක සමග අනියම් සම්බන්ධතාවක් පවත්වා ඇති අතර ඇයද දරුවන් තිදෙනෙකුගේ මවකි. තම බාල දියණියද කැටුව පැමිණ මෙම කාන්තාව අනියම් සැමියා සමග හක්මණ මුරනාමුරයේ කුලී නිවෙසක ජීවත්වී ඇත.

හක්මණ ප්‍රදේශයේ ජීවත්වූ මේ යුවළ පිළිබඳව ප්‍රදේශවාසීහුද කිසිදු සැකයක් නොසිතූහ. පුරුෂයා සුපුරුදු රියැදුරු රස්සාව කරගෙන ජීවත් විය. මොවුන් ඉකුත් ඇසළ පොහොය දිනයේ සිය පවුලේ අය සමග ලොරි රථයකින් බෙලිඅත්ත හා තංගල්ල ප්‍රදේශවල දන්සල් වැඳීමට හා පොසොන් සිරි නැරඹීමට ගොස් ඇති අතර අතරමගදි අම්බලන්තොට ප්‍රදේශයේ අයෙකු මොහුව හඳුනා ගැනීම හේතුවෙන් එම ආරංචිය නිත්‍යානුකූලව බිරිඳ වෙත ලැබී ඇත. ලද ආරංචියට අනුව ඇය සැමියා සොයා හක්මණට පැමිණ හක්මණ පොලිසියේ පිහිට පැතුවාය.

හක්මණ පොලිසියේ විවිධ පැමිණිලි අංශය මේ පිළිබඳවද සොයා සැමියා බිරිඳ දරුවන් දෙදෙනා අනියම් බිරිඳ හා දරුවන්ද පොලිසියට කැඳවා විමර්ශන කටයුතු සිදු කළ අතර එහිදී නීත්‍යානුකූල බිරිඳ සැමියා ඉල්ලා හඬා වැටුණාය. සැමියා ද බිරිඳ හා දරුවන් සමග අම්බලන්තොටට යෑමට කැමැති වී පොලිස් පොතේඅත්සන් කර සතුටින් අම්බලන්තොට බලා පිටත් වුණේය. අනියම් බිරිඳද අලව්ව ප්‍රදේශයේ ජීවත්වන තම සැමියාට දුරකථන ඇමතුමක් ලබාදී ඔහු සොයාගෙන අලව්ව බලා පිටත්වුණාය.