(කේ. බුද්ධික කුමාරසිරි)

හංවැල්ල තුන්නාන ප‍්‍රදේශයේ තරුණයෙකුට අයත් රුපියල් ලක්ෂ පහක් පමණ වටිනා නවීන පන්නයේ සුපිරි යතුරුපැදියක් විකිණීම සඳහා අන්තර්ජාලයේ පළ කරන ලද දැන්වීමකට අනුව එය මිලදී ගැනීමට පැමිණි පුද්ගලයකු යතුරුපැදියෙහි තත්ත්වය පරීක්ෂා කිරීමට යැයි පවසා යතුරුපැදිය ද සමඟින් පලා ගොස් ඇතැයි පාදුක්ක පොලිසිය පවසයි.

අන්තර්ජාලයේ පළ කර තිබූ දැන්වීම දැක තමන් නුවර ප‍්‍රදේශයේ බවට හැඳින් වූ පුද්ගලයෙකුු දුරකතන ඇමතුමක් ලබා දී පවසා ඇත්තේ යතුරුපැදිය මිලදී ගැනීමට තමන්ගේ කැමැත්තක් ඇති බැවින් එය පරීක්ෂා කිරීම සඳහා තුන්නාන ප‍්‍රදේශයේ නිවසට පැමිණෙන බවයි.

ඒ අනුව දුරකතන ඇමතුම ලබා දුන් පුද්ගලයා තුන්නාන ප‍්‍රදේශයට පැමිණ අදාළ යතුරුපැදිය හොඳින් නිරීක්ෂණය කර එහි තත්ත්වය පරීක්ෂා කිරීම සඳහා කෙටි දුරක් ධාවනය කර බැලීමට අවශ්‍ය යැයි පවසා ඇත. පසුව යතුරුපැදිය හිමි තරුණයාගෙන් යතුරුපැදියේ ගියර් කි‍්‍රයා කරවීම ආදී කරුණු විමසා යතුරුපැදියේ නැගී හංවැල්ල දෙසට ධාවනය කර ඇති බව ද පැමිණීමට ප‍්‍රමාද වීම නිසා දුරකතන ඇමතුමක් ලබාගෙන විමසූ විට යතුරුපැදිය රැගෙන ගිය පුද්ගලයා පවසා ඇත්තේ ඉන්ධන අවසන් වීම නිසා ඉන්ධන ලබා ගැනීමට යන බවත් ඉන්ධන ලබාගත් විගස යළි පැමිණෙන බවත්ය.

ඒ අනුව පැය කිහිපයක් බලා සිටිය ද යතුරුපැදිය රැගෙන ගිය පුද්ගලයා යළි නොපැමිණුන බැවින් යළිත් දුරකතන ඇමතුමක් ලබා ගත්ත ද ඒ වන විට දුරකතනය ද ප‍්‍රතිචාර දක්වා නොමැති බව ද යතුරුපැදියේ හිමිකරුවා පාදුක්ක පොලිසියට සිදු කළ පැමිණිල්ලෙහි සඳහන් වේ.

අදාළ පැමිණිල්ල ලද වහා කි‍්‍රයාත්මක වූ පාදුක්ක පොලිසිය යතුරුපැදිය රැුගෙන පලා ගිය පුද්ගලයාගේ දුරකතන අංකය පිළිබඳව තොරතුරු සොයා බැලීමේදී අනාවරණය වී ඇත්තේ එම දුරකතනයේ තිබී ඇත්තේ යතුරුපැදිය රැුගෙන පලා ගිය දිනයට පෙර දිනයේ මිලදී ගත් සිම් පතක් බවත් එම දිනයෙන් පසු කි‍්‍රයාත්මක කර නොමැති බවත් අනාවරණය වූ බවය.

කෙසේ වුවද අදාළ සැකකාර පුද්ගලයා යතුරුපැදිය ද රැගෙන පලා ගිය මාර්ගයේ සවිකර ඇති ආරක්ෂක කැමරා සහ විද්‍යාත්මක කරුණු උපයෝගී කර ගනිමින් සැකකරු අත්අඩංගුවට ගැනීමේ කටයුතු සිදු කරන බව ද පාදුක්ක පොලිසියේ ජ්‍යෙෂ්ඨ නිලධාරියෙක් පැවසීය.