කිසියම් පිරිසක් විසින් විදේශිකයකු මරා දමා ඇති බවට පොලිස් හදිසි ඇමතුම් ඒකකය හරහා ලද පණිවිඩයක් අනුව එහි ගිය පොලිස් නිලධාරීන්ට විදේශ පක්ෂියකු මැරී සිටින අයුරු දැක ගත හැකි වීමේ සිද්ධියක් බස්නාහිර පළාතේ කොළඹට නුදුරු පොලිසියකින් වාර්තා විය. ඉකුත් සිකුරාදා (16) හදිසි ඇමතුම් ඒකකයෙන් එම පොලිස් ස්ථානයට දුරකතන පණිවිඩයක් ලබා දෙමින් කිසියම් පිරිසක් විදේශිකයකු මරා දමා එම පොලිස් වසමේ තැනකට ගෙනැවිත් දමා ඇති බව පවසා ඇත.

ඒ අනුව වහා ක‍්‍රියාත්මක වූ ස්ථානාධිපතිවරයා එදින ජංගම සංචාරයේ නියුතු පොලිස් නිලධාරීන්ට දුරකතන ඇමතුමක් ලබා දෙමින් වහා එම ස්ථානයට ගොස් ඔහු පැමිණෙන තෙක් ආරක්ෂාව සපයන ලෙස නියෝගයක් ලබාදීමටද අමතක නොකළේය.

මද වේලාවකින් ස්ථානාධිපතිවරයා අපරාධ අංශයේ නිලධාරීන් කිහිප දෙනකු ද සමග එම ස්ථානයට යාම සඳහා සිය නිල ජීප් රථය අසලට පැමිණෙනවාත් සමග එදින දුරකතන ක‍්‍රියාකරු ලෙස රාජකාරි කරන කොස්තාපල්වරයකු ස්ථානාධිපතිවරයා අසලට දිව විත් ආචාර කර සර්, සර් වන් වන් නයින් එකට වැරදිලා සර්, එයාලා නැවත දැනුම් දීමක් කළා. මැරිලා තියෙන්නේ විදේශිකයකු නොවෙයි, විදේශ පක්ෂියෙක් කියලා සර්. ආපසු නිල කාමරයට පැමිණි ස්ථානාධිපතිවරයා ඒ පිළිබඳව එම අංශ බාර උසස් පොලිස් නිලධාරියකුට පැමිණිලි කිරීමට කටයුතු කළේය.

බණ්ඩාරගම - බිමල් ශ්‍යාමන් ජයසිංහ