(දඹුල්ල - කාංචන කුමාර ආරියදාස)

වෙරි මතින් සංචාරක කාන්තාවකට සදාචාරය උගන්වන්න ගිය පුද්ගලයකු ඇයගේ සිගරැට්ටුවක් දල්වා ගෙන නැවත පැමිණි අපූරු පුවතක් ගාල්ල ප‍්‍රදේශයට නුදුරු වෙරළබඩ සංචාරක හෝටලයකදී  වාර්තා විය.

මෙම සංචාරක හෝටලයේ මංගල සාදයක් පැවැත්විණි. ඒ සඳහා දිවයිනේ පළාත් කිහිපයකම ඥාතීහු මෙම මංගල සාදයට පැමිණ සිටියහ.

ගාල්ලට කිලෝමීටර් ගණනාවක් දුරින් ග‍්‍රාමීය ප‍්‍රදේශයක ඥාති පවුල් කිහිපයක්ද එම විවාහ මංගල උත්සවයට පැමිණ සිටීම විශේෂත්වයකි. වෙරළ තීරයේ බිකිනි ඇඳුමින් සැරසී විදේශීය කාන්තාවන් ඇවිදීම හා පිහිනීම සිදුකරන ආකාරය සංචාරක හෝටලය සමීපව දර්ශනය වෙමින් තිබිණි.

වෙරි වූ ග‍්‍රාමීය ප‍්‍රදේශයකින් පැමිණි ඥාතිවරයා මෙම කාන්තාවන්ට සදාචාරයක් නොමැති බව මහ හයියෙන් පවසමින් දරුවන් හදාගන්නට හැකියාවක් නැති බවද පවසමින් විදේශීය කාන්තාවන්ට හොඳ දෙකක් කියා එනවා යැයි පවසමින් බැණ වැදී එම ස්ථානයට ගොස් ඇත.

සංස්කෘතිය ගැනත්  සාරධර්මය ගැනත් සංචාරක කාන්තාවන්ට සිංහල භාෂාවෙන් බැණ වදිමින් මොහු කියාදුන් අතර මේ බවක් නොතේරුණු විදේශීය කාන්තාවක අතරින් එක් කාන්තාවක් තමන් අත තිබූ සිගරැුට්ටුවක් දල්වාගෙන තවත් සිගරැුට්ටුවක් සහ ලයිටරය ඔහු අත තැබුවාය.

සදාචාරය පිළිබඳව දේශන දෙන්නට ගිය ඔහු විදේශීය කාන්තාවන් ලබාදුන් සිගැරැුට්ටුව දල්වාගෙන දුම් බෝල අරිමින් නැවතත් හෝටලයේ ඥාතීන් සිටින ස්ථානයට පැමිණීමත් සමඟ ඥාතීහු ඔහුට උසුළුවිසුළු කළහ. පසුව ලැජ්ජාවෙන් ඇඹරෙමින් සිටි ඥාතියා ඔවුන් පැමිණි වාහනයටම ගොස් නිදාගත්තේය.