(නයිනමඩම චන්දන ප්‍රනාන්දු)

තම සැමියාගේ දුරකතනයේ ඔහු සුදු ජාතික කාන්තාවක් සමග ඇගේ කරට අත දාගෙන ගත් ඡායාරූපයක් තිබෙනු දැක දැඩි කලබලයට පත්ව එම සුදු ජාතික කාන්තාව සොයා ගොස් කලබලයක් කළ බිරිඳක් පිළිබඳව පුවතක් පසුගියදා වෙන්නප්පුව ප්‍රදේශයෙන් වාර්තා විය.

ප්‍රදේශයේ මෝටර් රථ අලෙවි අංශයේ සේවය කළ අයකු නිතරම විවිධ රාජකාරි වැඩවලට කොළඹ හා වෙනත් ප්‍රදේශවලට යාම නිසා කාර්ය බහුල තත්ත්වයක සිටියදී එක් දිනක් ස්මාර්ට් වර්ගයේ දුරකතනය නිවසේ අමතකව රාජකාරියකට ගොස් තිබේ.

 නිවසේ වැඩ ටික අවසන් කොට ටිකක් විවේකයෙන් සිටීමට ගිය බිරිඳට තම සැමියා ජංගම දුරකතනය අමතකව දමා ගොස් තිබීම නිසා එය අතට ගෙන පරික්ෂා කිරීමේදී ඡායාරූප එකතුවේ තිබූ ඡායාරූප කීපයක් දැක බොහෝ සේ කලබලයට පත්ව ඇත.

ඒ තම සැමියා සුදු ජාතික කාන්තාවක් සමග කරට අත දාගෙන ඉතා ආදරයෙන් ගත් ඡායාරූප කීපයක් එහි තිබීම නිසාය. මේ ගැන තමන්ගේ යෙහෙළියන්ටත් සැමියාගේ මව්පියන්ටත් පවසා සැමියාට හොඳ පාඩමක් උගන්වන්නම් කියා සැමියා එන තෙක් මග බලමින් සිට තිබේ.

 තම සැමියා සවස් කාලයේ තම රාජකාරි අවසන් කර නිවසට ගොඩවනවාත් සමග “මේ සුදු ගෑනි එක්ක කවදද රෝන්දේ ගැහුවේ” කියලා ඇසූ විට කිසිම දෙයක් නොදැන සිටි සැමියා අන්දුන් කුන්දුන් විය.

කොහොම හරි සාවධානව කරුණු විමසීමේදී තම දුරකථනයේ ඡායාරූප කීපයක් පෙන්වීමත් සමග තම බිරිඳගේ වැරදි අවබෝධය ගැන වචනවලින් තේරුම් කළත් එය නොපිළිගත් නිසා බිරිඳවත් වාහනයේ නංවාගෙන ප්‍රදේශයේ සංචාරක හෝටලයක තිබෙන මූර්තියක් ළඟට කැඳවාගෙන ගොස් කරුණු පැහැදිලි කළ විට බිරිඳ ඇත්ත තත්ත්වය තේරුම් ගත්තේය.