(අකිල බද්දෙවිතාන)
දින කිහිපයකට පෙර කොළඹ කොල්ලූපිටියේ තරු පහේ හෝටලයකට ත‍්‍රීරෝද රියක් ඇතුළු කැරිණි. එම හෝටලයට ත‍්‍රීරෝද රථ ඇතුළු කිරීමට ඉඩ නොදෙන නමුත් එහි සිටි පුද්ගලයා කියා සිටියේ තමාගේ කකුලක් අනතුරට ලක්වී ඇති බවයි. කිහිලිකරුවක්ද ඔහු ළඟ විය.

කිහිලිකරුවෙන් හෝටලයට ඇතුළුවූ ඔහු එහි ලොබියේ අසුන්ගත්තේය. හෝටලයේ කාමරයක අංකයක් කී ඔහු තමා එහි කාමරයේ සිටින බව ද සඳහන් කළේය. ඔහු කී විස්තර කළමනාකරුගේ පරිගණක තිරයේද දිස්විය. කාමරයේ යතුර කොහෙදෝ වැටී ඇතැයි ඔහු කීීය. කෑම ඇණවුම් කරද්දී ඔහු බ්ලැක් ලේබල් විස්කි බෝතලයක්ද ඇනවුම් කළේය. එවැනි හෝටලයක බ්ලැක් ලේබල් විස්කි බෝතලයක මිල රුපියල් 45,000 ක් පමණ වේ. රෑට කෑමෙන් පසුව විස්කි බෝතලය ඔහුගේ සහායකයාට දී ඔහුත් සමඟ හෝටලයෙන් පිටවී ගියේය.

කළමනාකරු ඉන්පසු ඔහු කිවූ කාමරයට බිල යැව්වේය. කාමරයේ ආගන්තුකයාට තරු පෙනිණි. ඔහු එම දේවල් ඇණවුම් නොකළ බව කීය. කළමනාකරු පොලිසි ගියේය. පොලිසිය හෝටලයේ සීසීටීවී ආරක්‍ෂක කැමරා පිරික්සුවේය. එමගින් ත‍්‍රිරෝද රියැදුරා සොයාගත්තේය. පොලිසිය ඔහුගෙන් ප‍්‍රශ්න කළේය. හරි හොඳ මහත්තයා, මාත් එක්ක ඉඳ හිටලා ඔහොම හෝටල්වලට යනවා. මහත්තයා කාලා බීලා මටත් දෙනවා. අඩියකුත් දෙනවා. එදා මහත්තයා මාත් එක්ක හෝටලයට ගියා. කෑවා බීවා. මටත් දුන්නා. මහත්තයා අතුරුගිරිය පැත්තේ ගෙදරටත් ගිහින් ඇරලූවා.

පොලිසිය ඔහු සොයා ගත්තේය. ඔහු විශ‍්‍රාමිකයෙකි. වයස 61 කි. විශ‍්‍රාම ගත්තේ පොලිස් බුද්ධි අංශයෙනි.