තායිලන්තයේ ගුහාව තුළ සිරවූ දරුවන් බේරාගැනීමේ මෙහෙයුමේ යෙදී සිටි තායිලන්ත නාවුක කිමිදුම්කරුවකු මියගොස් ඇත. 

ගුහාව තුළ ඔක්සිජන් ටැංකි ගෙනයමින් සිටියදී මොහුට සිහිනැතිවී ඇති බවත් ඔහුගේ සගයන් විසින් ගුහාවෙන් පිටතට රැගෙනවිත් ප්‍රථමාධාර ලබා දුන්නද බේරා ගැනීමට නොහැකි වී ඇති බව වාර්තා වේ.

දක්ෂ ධාවකයෙකු සහ පාපැදිකරුවක් වන මොහු මෙහෙයුම පටන්ගත් මොහොතේ සිට විශාල දායකත්වයක් ලබාදුන් බවත් පැවසේ.
ඔහු නාවුක හමුදාවෙන් ඉවත්ව සිටියද දරුවන් මුදාගැනීම වෙනුවෙන් උපකාරකිරීම සඳහා නැවත පැමිණ සිටියදී මෙසේ අනතුරට ලක්වී ඇත.

ගුහාව ඇතුළත මෙහෙයුම අවදානම් වුවත් දහසක පමණ පිරිසක් දැඩි උද්යෝගයෙන් මෙහෙයුම් කටයුතු වල නිරතව සිටින බවත් මාධ්‍ය වාර්තා කර ඇත. විශාල පිරිසක් ගුහාව තුල මෙහෙයුම් කටයුතු වල නිරතව සිටින බැවින් ගුහාවේ ඔක්සිජන් මට්ටම අඩු වෙමින් පවතී. 

මේ හේතුවෙන් දරුවන් සිටින ස්ථානයට වාතය ලබාදීම සඳහා කිලෝමීටර් පහක් දිග බටයක් මේ වනවිට සකස් කරමින් සිටියි. 

කෙසේ වුවද තායි නාවුක බලධාරීන් පවසන්නේ මෙහෙයුම දිගටම කරගෙන යන බවයි.

(බීබීසි ඇසුරිනි - 085)