(බිඟුන් මේනක ගමගේ සහ හර්ෂණ තුෂාර සිල්වා )

බැදුම්කර ගනුදෙනුව සිදුවූ අවධියේදී වෙනත් ප්‍රාථමික ගැනුම්කරුවන්ගේ සමාගම්වල ප්‍රධාන විධායක නිලධාරින් හා හිටපු මහ බැංකු අධිපති අර්ජුන් මහේන්ද්‍රන් අතර කිසිදු දුරකථන සන්නිවේදන කටයුත්තක් සිදු වී නැතත් පර්පචුවල් ට්‍රෙෂරීස් සමාගමේ ප්‍රධාන විධායක නිලධාරිවරයා හා ඔහු අතර කෙටි පණිවුඩ හුවමාරු වී ඇති බව බැඳුම්කර ජනපති කොමිසම් වාර්තාවේ ආන්දෝලනයට තුඩුදුන් සී 350 නමැති ලේඛනයේ සඳහන්ව ඇත.

ජනාධිපති ලේකම් ඔස්ටින් ප්‍රනාන්දු මහතා කළ දැනුම්දීමක් මත ජාතික ලේඛනාරක්ෂක   දෙපාර්තමේන්තුව විසින් නිකුත් කරන ලද එම ලේඛනයේ මූලික කරුණු මෙසේය.

වසර 2015 පෙබරවාරි 1 වැනිදා සිට 2016 වසරේ අප්‍රේල් මස 1 වැනිදා දක්වා බැදුම්කර නිකුත් කිරීම් සහ බැහැර කිරීම් සම්බන්ධයෙන් ජනාධිපති කොමිෂන් සභාවේ විමර්ශනවලට අදාළව මෙම ලේඛනය සකස් කරනු ලැබ ඇත්තේ ශ්‍රී ලංකා පොලිසියේ අපරාධ විමර්ශන දෙපාර්තමේන්තුවේ උප පොලිස් පරීක්ෂක යසන්ක යෙහාන් ජයසිංහ මහතා විසිනි.

මෙම ලේඛනය කොටස් දෙකකින් යුක්ත වන අතර පළමු කොටස තොරතුරු සහ දත්ත ඒකරාශි කිරීම, ක්‍රියාවලිය සහ විශ්ලේෂණය හා සොයාගැනීම් වශයෙන් සමන්විතවේ. දෙවැනි කොටස ඇමුණුමුවලින් යුක්තය.

මෙම දුරකථන දත්ත 2015 ජනවාරි 1 වැනිදා සිට 2017 ජුනි 20 දක්වා කාලයට අදාළ වන අතර ශ්‍රී ලංකා ටෙලිකොම්  සහ ඩයලොග් ආසියාටා  යන සමාගම්  එටිසලාට් ලංකා, භාරතී එයාර්ටෙල් ලංකා, මොබිටෙල් යන පෞද්ගලික සමාගම්වලින් මෙම දත්ත නිදහස් කර ඇත.

හිටපු මහ බැංකු අධිපති අර්ජුන් මහේන්ද්‍රන් මහතා 2015 වසරේ ජනවාරි 23 වැනිදා සිට 2017 වසරේ ජුනි 20 වැනිදා දක්වා දුරකථනයෙන් කළ සන්නිවේදන කටයුතුවලට අදාළ තොරතුරු මෙහි ඇතුළත් වේ. අදාළ කාලයට දින 880 ක් ඇතුළත් වන නමුත් එටිසලාට් ආයතනයට අනුව මහේන්ද්‍රන් මහතාගේ දත්ත සඳහන් වන්නේ දින  644 ක පමණි. ඉතිරි දින 236 හි ඔහු දුරකථනය පාවිච්චි කළේද නැද්ද යන්නට දත්ත නැතැයි වාර්තාවේ සඳහන් වේ.

පර්පචුවල් ට්‍රෙෂරීස් සමාගමේ ප්‍රධාන විධායක නිලධාරි කසුන් පලිසේන හා අර්ජුන් මහේන්ද්‍රන් මහතා අතර එම කාලයේදී දුරකථන ඇමතුම් 27 ක් හුවමාරු වී ඇත. එයින් ඇමතුම් 15 ක් ගෙන ඇත්තේ මහේන්ද්‍රන් මහතාය. ඔහුට ලැබුණු ඇමතුම් ගණන 12කි. මෙම කාලයේදී මහ බැංකු අධිපතිවරයා තවත් දුරකථන අංක භාවිත කර ඇතත් මෙහි තොරතුරු සඳහන් වන්නේ 07222 46361 ට අදාළව පමණි.

අදාළ කාලයේදී ප්‍රාථමික ගැනුම්කරුවන්ගේ සමාගම්වල (තනි) ප්‍රධාන විධායක නිලධාරින් හා හිටපු මහ බැංකු අධිපතිවරයා අතර කිසිදු දුරකථන සන්නිවේදන කටයුත්තක් සිදු වී නැතත් එම කාලයේදී පර්පචුවල් ටේ‍රෂරීස් සමාගමේ ප්‍රධාන විධායක නිලධාරි කසුන් පලිසේන මහතා අතර ( 2015 පෙබරවාරි 1 සිට 2017 ජුනි 20 ) කෙටි පණිවුඩ 7 ක් හුවමාරු වී ඇත.

හිටපු මහ බැංකු අධිපති අර්ජුන් මහේන්ද්‍රන් සහ ඉන්දික සමන් කුමාර යන අය අතර 2015 ජනවාරි 23 සිට 2017 ජුනි 20 දක්වා කාලයේදී සිදුව ඇති දුරකතන ඇමතුම් සංඛ්‍යාව 30 කි.

ඉන්දික සමන් කුමාර මහතා ශ්‍රී ලංකා මහ බැංකුවේ රාජ්‍ය ණය දෙපාර්තමේන්තුවේ ප්‍රධාන කළමනාකරුවෙකු ලෙස කටයුතු කළ කාලයේ දී සිදු වූ දුරකතන ඇමතුම් සංඛ්‍යාව 7 ක් වන අතර ඔහු සේවක අර්ථසාධක අරමුදලේ ජ්‍යෙෂ්ඨ සහකාර අධීක්ෂක ලෙස කටයුතු කාලයේදී සිදු වූ දුරකතන ඇමතුම් සංඛ්‍යාව 16කි.

අර්ජුන් මහේන්ද්‍රන් මහතා මහ බැංකු අධිපති ධුරයෙන් ඉවත්වීමෙන් පසු ඔහු හා ඉන්දික සමන් කුමාර අතර සිදුව ඇති ඇමතුම් ගණන 11කි.

අර්ජුන් ඇලෝසියස් හා ඉන්දික සමන් කුමාර අතර 2015 ජනවාරි 9 සිට 2016 ඔක්තෝම්බර් 18 අතර දුරකථන ඇමතුම් 38 ක් හුවමාරු වී ඇත. 2016 ඔක්තෝම්බර් 23 සිට 2017 ජනවාරි 26 අතර වයිබර් තාක්ෂණය ඔස්සේ ඇමතුම් හෝ ඇමතීමට උත්සාහ ගත් අවස්ථා 448 කි.

ශ්‍රී ලංකා මානව හිමිකම් කේන්ද්‍රය සහ විවිධ දේශපාලන හා සිවිල් සමාජ කණ්ඩායම් මෙම ලේඛනය ඉල්ලා පසුගිය කාලය මුළුල්ලේ රජයට දැඩි බලපෑමක් කළේය.

මෙම ලේඛනය තුළ පාර්ලිමේන්තු පොදු ව්‍යාපාර පිළිබඳ කාරක සභාවේ හිටපු සාමාජිකයන් රැසක් හා මහ බැංකුවේ හිටපු අධිපති අර්ජුන් මහේන්ද්‍රන්, පර්පෙචුවල් ට්‍රෙෂරීස් හිමිකරු අර්ජුන් ඇලෝෂියස් අතර සිදූ වී යැයි කියන දුරකතන ඇමතුම් පිළිබඳ තොරතුරු ඇතුළත් බැවින් රජය එය සඟවාගෙන සිටින්නේ යැයි ඔවුහු චෝදනා කළහ.