ශ්‍රී ලංකේය ගීත සාහිත්‍යයට අමරණීය ගීත රාශියක් දායාද කළ ගේය පද රචක හේම ශ්‍රී ද අල්විස් මහතා පෙරේදා (1) සිය දිවි ගමන නිමා කළේය.  

‘මැණිකේ ඔබේ සිනාවේ’, ‘දෑස පා සිනා කියන රහස තේරුණා’, ‘මධු සඳෙන් තවත් සුපුන් සඳක් උදාවේ’, ‘නෙත් යුග රන් තරු’, ‘සුදු සඳ රැස් ගලන’, ‘ශ්‍රීණි විභූෂිත ලංකා’, ‘කඳ සුරිඳුනි ඔබෙ ඔද තෙද දැක’, ‘දුනුකෙයියා මලක් වගේ’, ‘සඳක් නැගී සඳක් ගිලෙයි’ ආදී ජනප්‍රිය ගීත රාශියක් ඔහු රචනා කර ඇත.

හේම ශ්‍රී ද අල්විස් මහතා විසින් රචිත මුළු ගීත සංඛ්‍යාව 2000 ක් පමණ වේ.

අල්විස් මහතා 1977 සිට 1997 දක්වා ගුවන් විදුලියේ වැඩසටහන් නිෂ්පාදකවරයෙක් ලෙසද කටයුතු කළ අතර, කලක් වෙළෙඳ දැන්වීම් ක්ෂෙත්‍රයේ නිර්මාණ රචකයෙකු ලෙස ග්‍රාන්ට් ආයතනයේ ද කලක් සේවය කළේය.

ඔහු එහිදී එකල ප්‍රසිද්ධියට පත්ව සිටි ගායක ගායිකාවන් රැසකට මෙන්ම චිත්‍රපට රැසකටද ගීත රචනා කර ඇත.

සිංහල බස සුන්දර හා අරුත්බර ලෙස මෙන්ම ලයාන්විත විලාශයකින් පෙළ ගැස්වීමේ මනා හැකියාවක් ඔහු සතුවිය.

ගුවන් විදුලියේ ‘ඒ’ ශ්‍රේණියේ ගායිකාවක වූ අයිරින් ද අල්විස් මහත්මිය සමඟ විවාහ වී සිටි හේම ශ්‍රී ද අල්විස් මහතා පුතුන් දෙදෙනකුගේ පියෙකි.

අයිරින් ද අල්විස් මහත්මිය ද ඔහු විසින් රචිත ‘දෑස පා සිනා’, ‘සඳ වගෙ ලස්සන රූපිකා’, ආදී ජනප්‍රිය ගීත ගණනාවක් ගායනා කර ඇත.

අයිරින් ද අල්විස් මහත්මිය ද 2018 වසරේදී අභාවප්‍රාප්ත වූවාය.

(ඩයනා උදයංගනී)