බිඟුන් මේනක ගමගේ 
 
හිටපු ජනාධිපති මහින්ද රාජපක්ෂ මහතා සමග දේශපාලන ගමනක් යෑමට එක්සත් ජාතික පක්ෂයේ පාර්ලිමේන්තු මන්ත්‍රීවරුන් විස්සක් දැනටමත් සූදානම් යැයි එක්සත් ජනතා නිදහස් සන්ධාන හම්බන්තොට දිස්ත්‍රික් පාර්ලිමේන්තු මන්ත්‍රී ඩී.වී චානක මහතා ‘ලංකාදීප’ යට පැවසීය.
 
ඒකාබද්ධ විපක්ෂයට පෙර ශ්‍රී ලංකා නිදහස් පක්ෂ ඇමැතිවරුන් සමග එක්වී එක්සත් ජාතික පක්ෂ ආණ්ඩුවක් හදන බවට එක්සත් ජාතික පක්ෂ කුරුණෑගල දිස්ත්‍රික් පාර්ලිමේන්තු මන්ත්‍රී තුෂාර ඉඳුනිල් මහතා ප්‍රකාශ කළ ද මෙම මන්ත්‍රීවරුන් පිරිස හිටපු ජනාධිපතිවරයා සමග දැනටමත් සාකච්ඡා කර අවසන් යැයි ද චානක මහතා කීය.
 
සභාග රජයක් හැදීමට ඒකාබද්ධ විපක්ෂයට කඩිමුඩියක් නැතත් සුදුසුම මොහොතේ සුදුසුම තීන්දු ගැනීමට හිටපු ජනාධිපති මහින්ද රාජපක්ෂ මහතා සූදානම් යැයි ද මන්ත්‍රීවරයා අවධාරණය කර කීය.
 
ජනාධිපති මෛත්‍රිපාල සිරිසේන මහතා සහ හිටපු ජනාධිපති මහින්ද රාජපක්ෂ මහතා අතර ආණ්ඩුවක් හැදීම ගැන සාකච්ඡාවක් නොවුණ ද එක්සත් ජනතා නිදහස් සන්ධාන විධායක සභාවේදී පක්ෂ නායකයන් කීප දෙනෙකු අතර කිසියම් සාකච්ඡාවක් වී ඇතැයි ද ඩී.වී චානක මහතා සඳහන් කළේය.
 
ආණ්ඩු බලයක් ගැනීමේ දේශපාලන හදිසියක් නැතත් ආණ්ඩුව ආර්ථික අර්බුදයට මුහුණ දෙන වැරැදි පිළිවෙත නිසා ඉදිරියේදී බලයට පත්වන කවර දේශපාලන බලවේගයක් වුවද දුෂ්කරතාවයකට පත්වනු ඇතැයි ද එනිසා වඩාත් සුදුසු දේශපාලන තීන්දුවක් ගැනීමට ඒකාබද්ධ විපක්ෂය කටයුතු කරනු ඇතැයි ද චානක මහතා වැඩිදුරටත් සඳහන් කළේය.