යුරෝපයේ ප්‍රමුඛ ථෙරවාද බෞද්ධ විහාරස්ථානය ලෙසින් අභිනවයෙන් ඉදිකිරීමට සැලසුම් කර ඇති බර්මින්හැම් මහාවිහාරයේ නව ගොඩනැඟිලි අරමුදල සඳහා බරපැන උපයාගැනීමේ අරමුණෙන් විශේෂ ආධාර පත්‍රයක් හඳුන්වාදීමේ වැඩසටහනක් පසුගියදා ලන්ඩන් නුවර ශ්‍රී ලංකා මහා කොමසාරිස් කාර්යාලයේදී පැවැත්විණි.

ශ්‍රී ලාංකික බෞද්ධ වාස්තු විද්‍යාත්මක හැඩතල පිළිබිඹුවන අන්දමට අලුතෙන් ඉදිකෙරෙන විහාර මන්දිරයේ ප්‍රධාන අංගයක් ලෙස අනුරාධපුර රුවන්වැලි මහා සෑයේ දැවැන්ත අනුරුවක් ඉදිකෙරෙයි. ශ්‍රී ලාංකික විහාරස්ථානයක සැලැස්ම විදහා දැක්වෙන විහාර මන්දිරයක් බ්‍රිතාන්‍යයේ ඉදිවෙන පළමුවන අවස්ථාව මෙයයි.

ආධාර පත්‍රය හඳුන්වාදීමේ උත්සවය සඳහා මහා බ්‍රිතාන්‍යයේ ප්‍රධාන සංඝ නායක ලන්ඩන් බෞද්ධ විහාරාධිපති බෝගොඩ සීලවිමල නාහිමි, බර්මින්හැම් මහා විහාරාධිපති, මහා බ්‍රිතාන්‍යයේ ශ්‍රී ලංකා සංඝ සභාවේ උප සභාපති ඕබීඊ නාමධාරී ආචාර්ය විතාරන්දෙණියේ කස්සප නාහිමි ඇතුළු මහා සංඝරත්නය, වැඩ බලන ශ්‍රී ලංකා මහා කොමසාරිස් සුගීශ්වර ගුණරත්න, තානාපති නිලධාරින් වන නිරන්ජන් පතිරත්න, මනෝජ් වර්ණපාල, බර්මින්හැම් මහාවිහාර පාලක  මණ්ඩලයේ ලේකම්  යාන් ලව්ලොක්, ඈන් ලව්ලෝක් සහ හිරන්ත කළුආරච්චි ඇතුළු විශාල පිරිසක් සහභාගී වුහ.

බ්‍රිතාන්‍ය ශ්‍රී ලංකා සංසදයේ  සභාපති සහ බර්මින්හැම් මහාවිහාර පාලන මණ්ඩල සාමාජික ජනක අලහප්පෙරුම සහ බර්මින්හැම් මහාවිහාර පාලක  මණ්ඩලයේ ලේකම්  යාන් ලව්ලොක් පැමිණ සිටි පිරිස පිළිගනිමින් ආධාර එකතු කිරීමේ අවශ්‍යතාවය සහ වැදගත්කම  පිළිබඳ විස්තර කරමින් කතා කළහ.

විහාරාධිපති ආචාර්ය විතාරන්දෙණියේ කස්සප හිමියෝ අනුශාසනාව පවත්වමින් බර්මින්හැම් මහාවිහාරයේ කටයුතු සඳහා නිරන්තරයෙන් සහභාගි වන අතහිත දෙන සියලුම දෙනාට පුන්‍යානුමොදනා කළහ. බ්‍රිතාන්‍යයේ දෙවන ප්‍රධාන නඟරය ලෙස සැලකෙන බර්මින්හැම් නුවර පිහිටි ප්‍රධානතම ථෙරවාද බෞද්ධ විහාරය වඩාත් ඉඩ පහසුකම් ඇතිව නවීකරණය කිරීමේ අවශ්‍යතාවය පිළිබඳව විස්තර කළ උන්වහන්සේ ඒ සඳහා ආධාර ලබාගැනීමේ අරමුණෙන් පටන්ගන්නා ලද වැඩපිළිවෙලෙහි සමාරම්භය පැවැත්වීම සඳහා පහසුකම් සපයාදීම පිළිබඳව වැඩ බලන ශ්‍රී ලංකා මහකොමසාරිස් සුගීශ්වර ගුණරත්න ඇතුළු කාර්ය මණ්ඩලයටත්, ගොඩනැඟිලි කටයුතු කරගෙන යාම සඳහා මුල්‍යමය ආධාර සැපයීම ඇතුළු සෑම අයුරකින්ම සහාය වන සැමටත් උත්සවය සඳහා සහභාගි වූ මහා සංඝරත්නය ඇතුළු සියලුම දෙනාටත් ස්තුතිය පුද කළහ.