( ටී.කේ.ජී.කපිල )

නීතිවිරෝධී ලෙස මුහුදු මාර්ගයෙන් මෙරටට ගෙන ආ රුපියල් ලක්ෂ 70 ක් පමණ වටිනා වියළි කහ තොගයක් කටුනායක ප්‍රදේශය ඔස්සේ රැගෙන යමින් සිටි පුද්ගලයන් දෙදෙනෙකු සමග අත් අඩංගුවට ගැනීමට පොලිස් විශේෂ කාර්යය බළකායේ නිලධාරීන් පිරිසක් සමත් වී තිබුණි .

කිලෝ ග්‍රෑම් 1,253 යි ග්‍රෑම් 700 ක් බරැති මෙම වියළි කහ තොගය රැගෙන , කටුනායක 18 කණුව මෙන්ඩිස් ක්‍රීඩාංගණය අසළින් ගමන් ගනිමින් සිටි පුද්ගලයන් දෙදෙනා සමග අත් අඩංගුවට ගැනීමට මෙම පොලිස් විශේෂ කාර්යය බළකායේ නිලධාරීන් කටයුතු කර තිබුණි .

 මීගමුව පිටිපන ප්‍රදේශයේ පදිංචි 27 හැවිරිදි වර්ණකුලසූරිය සුමුදු අසාන් ප්‍රනාන්දු සහ එම ප්‍රදේශයේම පදිංචි 45 හැවිරිදි වෑවලගේ රෝඩ්ලස් සුජීව යන පුද්ගලයන් දෙදෙනා , නීරෝධායන ලෙස මෙරටට ගෙනැවිත් ඇති වියළි කහ තොගයක් කටුනායක ප්‍රදේශය ඔස්සේ ප්‍රවාහනය කරමින් සිටින බවට ලද තොරතුරු මත , කටුනායක 18 කණුව මෙන්ඩිස් ක්‍රීඩාංගණය අසළ රැක සිට මෙම අත් අඩංගුවට ගැනීම සිදු කර තිබුණි .

මෙසේ අත් අඩංගුවට ගත් වියළි කහ තොගය සහ ඒවා රැගෙන ගිය පුද්ගලයන් දෙදෙනා මේ වනවිට මීගමුව මහේස්ත්‍රාත් අධිකරණය වෙත ඉදිරිපත් කර තිබේ .