උණුසුම් කාලගුණය වකුගඩු ගල් ඇතිවීමට හේතුවක් බව පර්යේෂණයකින් තහවරු වී ඇත. අධික උෂ්ණත්වය හේතුවෙන් ශරීරය  වියළි බව වැඩිවේ. ජලය නැතිව විජලන තත්ත්වයට හටගනී. මේ හේතුවෙන් වකුගඩු ගල් ඇතිවීමේ අවදානම ඉහළ යන බව සොයාගෙන ඇත.

ෆිලඩෙල්පියාහි ළමා රෝහලේ පර්යේෂකයන් විසින් එක්සත් ජනපදයේ විවිධ නගරවලින් පැමිනි රෝගීන් 60,000ක් පමණ පරික්ෂණයට භාජනය කරමින් ඔවුන් මුහුණ දුන් විවිධ කාළගුණික සාධක ගැන ද සොයා බලා ඇත. එහිදී  අවබෝධ වී උණුසුම් පාරිසරික තත්ත්වයන් හා වකුගඩුවල ගල් ඇතිවීමේ රෝගීන් අතර සම්බන්ධයක් ඇති බවයි.

පරිසරයේ උෂණත්වය වැඩිවෙත් ම ඊලඟ දින විස්සේ දී වකුගඩුවල ගල් සහිත රෝගින්ගේ විශාල ලෙස වැඩි වීමක් දක්නට ලැබෙන බව මෙම පර්යේෂණ ප්‍රධානි මෞත්‍ර රෝග පිලිබඳ විශේෂඥ ග්‍රෙගරි ටාසියන් කියයි.

2005 සිට 2011 දක්වා වකුගඩුවල ගල් ඇති රෝගී වැඩිහිටියන්ගේ සහ ළමයින්ගේ වෛද්‍ය වාර්තා 60,000 ක් පමණ ඇට්ලන්ටා,චිකාගෝ, ඩලස්,ලොස් ඇන්ජලිස් සහ ෆිලඩෙල්පියා යන නගරවලින් ලබා ගනිමින්  විශ්ලේෂණයට භාජනය කර ඇති අතර එම නගර වල කාලගුණ වාර්තාද විශ්ලේෂණය කර තිබේ.

මෙහිදී සාමාන්‍ය දෛනික උෂ්ණත්වය වැඩිවු විට සියලුම නගරවල  පුද්ගලයන්ගේ වකුගඩුවල ගල් ඇතිවීමේ අවධානම ඉහළ ගොස් තිබේ.

විශේෂඥ වෛද්‍ය ටාසියන් මෙසේ පවසයි.

‘‘ ලෝක කාලගුණ වෙනස්වීම් ජනතාවගේ සෞඛ්‍යයට සෘජුව ම බලපෑම් එල්ලකරන බව මෙයින් පෙනී යනවා. ඉහළ උෂ්ණත්වයේ දී මිනිසුන්ගේ සිරුර විජලනයට භාජනය වීමෙන් ඔවුන්ගේ මුත්‍රාශවල කැල්සියම් හා අනෙකුත් ඛණිජ ලවණ සාන්ද්‍රනය ඉහළ යෑමෙන් වකුගඩු ගල් ඇතිවීමට එය බලපෑමක් වනවා. “

 විද්‍යාඥයින් වාර්තාකර ඇත්තේ ලෝකයේ සමස්ථ ගෝලීය උෂ්ණත්වය වර්ෂ  2000 සිට 2009 වන විට ගතවූ පසුගිය වසර 11,300 ට වඩා  සියයට 82 කින් පමණ ඉහළ ගොස් ඇති බවයි.

හරිතාගාර වායු විමෝචනය හේතුවෙන් පෘථිවියේ උෂ්නත්වය සාමාන්‍යයෙන්  සියයට 1 සිට 4.5 කින් පමණ 2100 වන විට ඉහළ යාහැකි බව පැවසේ.

ටාසියන් වැඩිදුරටත් පවසන්නේ පසුගිය වසර 30 තුලදි වකුගඩු ගල් රෝගය ඉහළ ගොස් ඇති අතර මෙම තත්වය දිගටම පැවතිය හැකි බවයි. විශේෂයෙන් දිනපතා උෂ්ණත්වය ඉහළ යන භුගෝලීය වෙන්ස්කම් සහිත දේශසීමා වල මෙම තත්වය පැවතිය හැකි බවද ටාසියන් අනතුරු අඟවයි.

මෙම අධ්‍යනය ගැන තොරතුරු ජාතික  පාරිසරික සෞඛ්‍ය විද්‍යායතන සඟරාවේ ප්‍රසිද්ධ කර ඇත.