ඇමෙරිකාවේ ජනාධිපති මැතිවරණය සඳහා රිපබ්ලිකන් පක්ෂයෙන් නාමයෝජනා ලැබීමට සුදුසුකම් ලබා සිටින ඩොනල්ඩ් ට්‍රම්ප් ඝාතනය කිරීමේ උත්සායක් වළක්වාලීමට ඇමෙරිකා  පොලිසිය සමත්විය.

ලාස්වේගාස් නගරයේ පැවති ඩොනල්ඩ් ට්‍රම්ප් සහභාගිවූ මැතිවරණ රැස්වීමක රාජකාරියේදී සිටි පොලිස් නිලධාරියකුගේ ගිනි අවිය උදුරා ගෙන ඩොනල්ඩ් ට්‍රම්ප්ට වෙඩි තැබිමට ගත් උත්සාහයක් ආරක්ෂක නිලධාරීන් මැදිහත්වී වළක්වා ඇත.

මෙම සිද්ධිය සම්බන්ධයෙන් සැකපිට  බ්‍රිතාන්‍ය ජාතිකයකු වූ මයිකල් ස්ටීවන් (19)   අත්අඩංගුවට ගෙන තිබේ.

ඔහු පවසා තිබුණේ තමන් එතැනට පැමිණියේ ඩොනල්ඩ් ට්‍රම්ප් මරාදැමීමට බවයි. ලාස්වේගාස් නගරයට පැමිණීමට කලින් ඔහු ගිනි අවි භාවිතය පිළිබඳව පුහුණු මධ්‍යස්ථානයකට ගොස් වෙඩි තැබීම පිළිබඳ සරල පුහුණුවක් ද ලබාගෙන ඇති බව විදෙස් මාධ්‍ය කියයි.

ඇමෙරිකා පොලිසිය මේ සිද්ධිය පිළිබඳව මෙතෙක් පැහැදිලි විස්තරයක් නිකුත් කර නැත. මෙතෙක් වාර්තා වී ඇති තොරතුරු අනුව දැනගැනීමට ඇත්තේ "ආරක්ෂක සීමාවන්ට යටත් කලාපයක ප්‍රචණ්ඩ ක්‍රියාවක් සිදු කිරීමට උත්සාහ කිරීම" සඳහා ස්ටීවන් සැන්ඵර්ඩ්ට විරුද්ධව චෝදනා ගොනුකර ඇති බවය.

මෙම සිදුවීමේ දේශපාලන සංවේදීභාවය නිසා සැබෑ තොරතුරු එළිවීමේ පමාවක් පවතින බවට විදෙස් වාර්තා සඳහන් කර ඇත.

සිද්ධිය පිළිබඳව බ්‍රිතාන්‍ය විදේශ අමාත්‍යංශයේ ප්‍රකාශකයකු පවසා ඇත්තේ අත්අඩංගුවට පත්ව සිටින බ්‍රිතාන්‍ය ජාතිකයාගේ දේශපාලන පසුබිම, සමාජ ක්‍රියාකාරකම් සහ මානසික ස්වභාවයන් පිළිබඳ වාර්තා ඇමෙරිකා බලධාරීන් වෙත සැපයීමට කටයුතු කර ඇති බවයි.