ජීවිත දෙකක් බිලි ගනිමින් දකුණු ඉන්දියාවේ තමිල්නාඩු ප‍්‍රාන්ත වෙරළ තීරය හරහා හමා ගිය ‘නීලම්’ සුළි කුණාටුව ඊයේ (1) ආන්ද්‍රා ප‍්‍රදේශයට කඩා වැදුණේය. පැයට කිලෝ මීටර් 89 ක වේලයකින් හමා යන සුළි කුණාටුව හේතුවෙන් ඉදිරි පැය 24 පුරාවට මහ වැසි සහ තද සුළං ඇති විය හැකි යැයි ආන්ද්‍රා ප‍්‍රදේශ් කාලගුණ විද්‍යා බලධාරීහු පවසති. සුළි කුණාටුව ගැන කල් තියා අනතුරු ඇඟවීමට හැකිවූ නිසා වෙරළ බඩ අවදානම් ප‍්‍රදේශවලින්  ජනතාව ඉවත් කිරීමට බලධාරීහු පියවර ගත්හ. ආන්ද්‍රා ප‍්‍රදේශය හරහා මීට පෙර මේ අයුරින් ප‍්‍රචණ්ඩ සුළි කුණාටුවක් හමා ගොස් ඇත්තේ 1977 වසරේදීය. ඊට 10,000 ක් බිලි වූහ. බෙංගාල බොක්කේ කැළැඹිලි ස්වභාවයක් හේතුවෙන් හටගත් ‘නීලම්’, දකුණු ඉන්දියාවේ තමිල්නාඩු ප‍්‍රාන්තයේ මහාබලිපුරම් වෙරළට කඩා වැදුණේ පෙරේදා (31) සවසය. සැඬ සුළං සහ ප‍්‍රචණ්ඩ රළ පහර හේතුවෙන් දකුණු ඉන්දීය වෙරළ තීරයට ඔබ්බෙන් ගමන් කරමින් තිබූ ‘ප‍්‍රතිභා කාවේරි’ නමැති තෙල් නැව චෙන්නායි වෙරළට ගොඩගැසීය. වෙරළාරක්ෂක නිලධාරීන් වහා කි‍්‍රයාත්මක වී නැවේ සිටි 37 දෙනා බේරා ගැනීමට උත්සහ දරා ඇත. එම 37 දෙනාගෙන් 21 දෙනකු බේරාගෙන ජීවිතාරක්ෂක බෝට්ටුවලින් වෙරළට රැගෙන එද්දී එම බෝට්ටු සැඬ රළ පහරට හසුවී පෙරැුළී ගියේය. එහිදී එක් අයකු මුහුදේ ගිලී ජීවිතක්ෂයට පත්වූයේය. 15 දෙනෙක් අතුරුදන් වූහ. අතුරුදන් වූවන් සොයා කඩිණමින් සෝදිසි මෙහෙයුම් ආරම්භ කළ නමුත් අයහපත් කලගුණය නිසා එම මෙහෙයුම්වලට බාධා එල්ල විය.